Mär sin die Heidebube aus Riedelbach, auch oft Heideriedelbubebach genannt! Unsär kla Kaff liescht im scheene Taunus,
umgebe von massisch Wald un Hüchel überall wo de hinguckst! Des is so zwanzisch Kilomedär weit wesch von de Franfotter Sitti,
middedrin in Hesse unn natürlisch aach im Herze Dschörmenies.

Gegründet hammer uns so 1989, da habbe sich so e paar Knallköpp zusammegetan, um in Ruh kicke zu könne. Tja, und wies halt so is, kame da als neue Leud dadezu, unn de Verahn wurd immär größä. Obberhalb vom Riedelbacher Tal, da iss die Heid, des is unsär Refuschium wo mär unsän Platz habbe, midde im Wald. Jeden Freidach treffe mär uns da obbe zum kicke und um unsär Fehischkeide unner Beweis zu stelle. Und danach wird immär noch schee mit dene Annere ausm Verahn ä Äbbelwoi gezischt oder ä Biersche in de Kopp geknallt!
Bis die Sonn weg is, manchemal aach ä bissi längär, gell?
Des Plätzie da, da mache mir all zusamme jeden Sommä so en Turnier, ne riesen Gaudi sach isch dir! "Taunus-Bembel-Kick" heisst de Spass, da kicke so zwanzisch bis dreisisch Teams, unn gewinne kannsde verschiedene Pochale unn Bembel, JA, Bembel, voll mid Äbbelwoi!
Kämpfe kannsde um de ersde Platz beim Kicke, dann habbe mär noch die Trinkwerdung unn letztlisch de "Blaindkick",
da mussde mit verbunnene Aache im Spiel Zwo geschen Zwo de Ball ins Toär draache,
unn drauße schteht Aaner deiner Kumbels unn schreit dich als a unn sacht dir, wo de hi musst!
Soo, mär hoffe, ihr seid jetzt ä bissi schlauär als wie vorher und könnt eusch ä Bild von de Heidebube mache. Achja, bevor ischs vergess, mär sin ja aach die Heidemädels! Falls da noch Fraache offe sin, dann schreibt doch emal dem Seitenmeisdär oder aach Dene vom Vorschdand.
Hoffentlisch sehn mär uns uffm TBK bei guudem Weddär und geniesse die schee Zeid, denn so jung komme mär net mehr zusamme.
Also, lasst emal von Eusch höre, und seid net bös des net die ganse Hoompäidsch in Hessisch is, mär müsse auch ab unn zu ma abbeide!
Tschö mit Ö, unn viel Spass moje!